Giluba angol sa maguwang

CEBU, Philippines - Kritikal ang kahimtang sa 24 anyos nga lalaki human kini dunggaba sa iyang maguwang nga nasuko kay gipawong   niya ang videoke sa ilang pag-inom ug pagkinantahay didto sa Sitio Sayaw, barangay Lutak siyudad sa Naga niadtong Domingo sa hapon.

Ang biktima mao si Ramil Alpuro, 24, minyo, nga nagpuyo sa maong lugar.

Samtang ang suspek mao ang iyang maguwang nga si Marcos Alpuro, hingkod, nga silingan ra usab sa biktima.

Si PO1 Wendy Acabal sa Naga City Police Station mibutyag sa Banat News nga ang biktima ug ang suspek sa sayo pa   nagpuli-puli og kanta sa videoke samtang nag-inom sa pinuy-anan sa biktima.

Apan dihang nangalasbag na kalit lang gipawong sa suspek ang videoke ug giilisan og laing music hinungdan nga mikisi-kisi sa kasuko ang biktima kay naputol ang pagkanta niini.

Sa kalagot sa biktima iya usab nga gi-ibot ang plug sa videoke hinungdan nga napawong kini sa hingpit nga maoy hinungdan nga misanting sa kasuko ang suspek.

Wa matagbaw sa iyang kasuko, mikuha kini og kutsilyo dayon gidunggab ang iyang manghud kinsa nasabak sa tiyan.

Dihang nakita niya nga mibuhagay na ang daghang dugo sa tiyan sa iyang manghud misibat usab dayon ang suspek.

Gihatud sa mga tagtungod ang biktima ngadto sa tambalanan samtang padayon pang gipangita sa kapolisan ang suspek sa paggama ning balita. (/WC) (BANAT NEWS)