Symposium sa day care worker malampuson

CEBU, Philippines - Gipangulohan ni Governor Gwendolyn Garcia ug ni Cebu 3rd District Cong. Pablo John “PJ” Garcia ang tinuig nga Symposium sa mga Day Care Worker sa tibuok lalawigan sa Sugbo didto sa Cebu International Convention Center (CICC) sa miaging adlaw.

Gitambongan sa 1,436 ka mga day care worker nga naggikan sa nagkalainlaing lungsod sa lalawigan sa Sugbo nga gibuksan ni Vice Governor Agnes Magpale.

Si Magpale   mipadayag sa iyang lig-ong suporta sa tanang mga day care worker.

Samtang si Kongresista PJ Garcia mipadayag sa iyang dakong kalipay nga gihatagan siya og higayon sa pakighimamat sa nahisgotang grupo ug mipadayag usab sa iyang suporta alang sa mga benepisyo nga gikinahanglan sa maong mga trabahante.

Mipasalig ang kongresista nga suportahan usab niya ang usa ka balaodnon   nga ipalabang ni Bayan Muna Party List Representative Kong. Teddy Casiño bahin sa Magna Carta for the Day Care Worker.

Gani si   Casiño nga mitambong usab sa maong kalihokan mibatbat   bahin sa tumong sa iyang balaodnon nga ang tanan alang sa kasigurohan sa mga day care worker sa ilang trabaho.

Sa maong balaod giprotektahan niini ang katungod sa mga trabahante sa day care sa barangay nga bisan kun mag-ilis-ilis og kapitan sa barangay dili apektohan ang pagpangimpleyo sa maong mga trabahante.

Gihisgotan usab sa maong balaodnon ang suholan sa mga day care worker nga sa pagkakaron honorium ra ug gusto usab nila ni Kong. PJ ug Gov. Gwen nga kahatagan kini og taas nga suweldo.

Busa sa gipanday nga balaodnon ni Casiño ibutang sa salary grade 8 ang matag trabahante sa day care.

Busa mapasalamaton kaayo ang Provincial Federation President sa mga day care worker nga si Estrella Manugas sa gipakitang suporta sa gobernador ug ni Kong. PJ Garcia. (BANAT NEWS)