Gi-ambush sa silingan patay

CEBU, Philippines - Usa ka lalaki ang giputos sa samad pinusilan sa duha ka lalaking nagmotorsiklo sa miaging adlaw diha sa sitio Kasagingan, Lawaan-3, dakbayan sa Talisay.

Ang biktima giilang si Arnold Roldan Sasing, 43, molupyo sa maong lugar ug lumad nga taga General Santos City samtang ang gitumbok nga suspetsado mao silang Ramil Matadero ug Eric Mercado.

Sa imbestigasyon sa kapolisan nasayran nga ang biktima sakay sa iyang motorsiklo patubang nga mouli apan gisundan kini sa mga suspek ug pag-abot sa maong dapit gipusil ang biktima.

Ang mga kriminal daling misibat, nakuha sa crime scene ang duha ka slugs sa kalibre .9mm nga gituohang gigamit sa mga suspetsado.

Si Insp. Hugo Rio Ipong, ang deputy Chief for Operation sa kapolisan sa syudad sa Talisay mibutyag nga ang biktima ug ang mga suspetsado managhigala kaniadto apan nagkasungi ug misangpot pa kini sa pagpanunggab ni Mercado sa biktima.

Base sa impormasyong nadawat ni Ipong gikatahong gipasanginlan sa suspek si Sasing nga maoy misunog sa iyang multicab.  (BANAT NEWS)