Taga Talisay gi-seminar bahin sa pagbahig sa basura

CEBU, Philippines - Na-edukar na ang mga kawani sa city hall sa dakbayan sa Talisay bahin sa “no segration, no collection of garbage policy”.

Kini human luwati ni Mayor Socrates Fernandez ang Memorandum No. 2012-160 bahin sa maong programa.

Gani atol sa seminar nga gipahigayon didto mismo sa city hall sa miaging adlaw matag department head gipadala usab og mga kauban nga gipapaminaw sa lektura bahin sa pagbahig sa basura.

Gipasabot sila nga dili kolektahon ang basura sa matag barangay gawas lang kun kini gibahig nang daan sa tagtungod. Si Talisay City Administrator, Richel Bacaltos nagkanayon nga dili buot ang kagamhanan sa Talisay nga ang nahitabong pagbaha sa Manila ug sa ubang lugar nga mikalas og kinabuhi mahitabo sa Talisay.    

Busa gihingusgan nila karon ang implementasyon sa pagbahig sa basura nga malata ug dili malata.

Ang siyudad mihimong pilot mga barangay    Poblacion, Pook, Lawaan III ug Bulacao   nga maoy monitoron pag-ayo bahin sa tukmang pagbahig sa basura.

Ang pagbaton og mga garbage truck ug material recovery facility (MRF) maoy usa sa nag-unang panginahanglan sa matag barangay.

Apan matud ni Bacaltos   nga unang i-implementar sa city hall ang no segration, no collection policy ug panid-an kun ang taga city hall mismo magtinarong ba sa pagtuman sa maong balaod.

Ang mapakyas sa pagtuman niini pahamtangan og silot, matud ni Bacaltos

Sa Septiyembre 1, 2012 ang upat ka pilot nga barangay magsugod na sa pagpatuman sa balaod nga   dili kolektahon ang ilang basura kundili kini bahigon daan.

Matud pa ni Bacaltos nga ipaayo pa nila ang ubang mga trak sa basura nga gipaayo pa sa ilang motor pool.

Gani sa 11 ka garbage truck sa dakbayan, upat   lang niini karon ang nagdagan nga maoy mangolekta sa basura sa nagkalainlaing barangay.

Hinuon giklaro ni Bacaltos nga ang ubang kabarangayan sa Talisay may kaugalingong garbage truck hinungdan nga dili sila maglisud pagkolekta   sa ilang basura.

(BANAT NEWS)