CEBU, Philippines - Sa ikatulong higayon makigsangka na usab si kanhi Mayor Avelino Gungob Sr. sa lungsod sa Consolacion kang Mayor Teresa Alegado sa sunod tuig nga piniliay kay gustong bawion sa kanhi mayor ang maong katungdanan gikan kang Alegado.
Kini human makadawat si Gungob og bendisyon gikan kang Gobernador Gwendolyn Garcia, ang pangulo sa One Cebu Party nga siya (Gungob) maoy gitugpo nga opisyal nga kandidato pagka-mayor sa One Cebu Party sa lungsod sa Consolacion sa umaabot nga election.
Si Gungob nga maoy nangulo sa giumol nga Movement for Progressive Consolacion (MPC) mipahigayon sa ilang labing unang convention nga gitambongan sa 5,000 kapin ka mga sakop nga naggikan sa 21 ka barangay sa Consolacion sa covered court sa nahisgotang lungsod sa miaging adlaw.
Si Gungob naparot kang Alegado sa milabay nga piniliay.
Apan misaad si Gungob nga paninguhaon niya nga mabawi niya ang bakus gikan ni Alegado nga gihuptan niya kaniadto.
Ang mga sakop sa MPC nga gipangulohan ni Gungob nanumpa na usab isip bag-ong sakop sa One Cebu Party ug miindosar kang 3rd District Congressman Pablo John Garcia nga ilang kandidato sa pagka- gobernador.
Nanumpa usab sila nga paluyohan si Gobernador Garcia alang sa pagka- senador.
Si Gungob uban kanila ni kanhi Vice Mayor Ember Alinsug, kanhi Konsehal Abinales ug kanhi Mayor Leo Go hugot nga nagkahiusa dili lang sa pagpakig-atbang kang Mayor Alegado kundili pagtunol usab sa ilang suporta sa tanang kandidato sa One Cebu Party.
Dugang nga mitambong sa ilang kalihokan mao si kanhi 6th District Congresswoman Nerissa Soon Ruiz nga nakapatumaw usab sa katahap nga mokandidato usab kini ubos sa One Cebu Party sa umaabot nga piniliay.
Hinuon si Kongresista Garcia nga nahinabi sa mga tigbalita miingon nga gipaabot pa nila ang hukom ni kanhi Kongresista Soon-Ruiz kun unsang posisyona ang gusto niining daganan sa umaabot nga piniliay.
Sa nasayran nga ang One Cebu Party sa ika-unom nga distrito sa lalawigan sa Sugbo wala pa usab makahukom kun si kinsa ilang kandidato sa pagka- kongresista sa maong distrito. (BANAT NEWS)