2 ka basurero way sala-Monares

CEBU, Philippines - Gipamatud-an sa kapitan sa barangay Kalunasan nga walay sala ang duha ka basurero niini kinsa sa sayo pa gipasinginlang maoy mipalusot og armas alang sa usa ka piniriso sa Cebu City Jail nga nahimutang sa maong barangay.

Mao kini ang pamahayag ni Kapitan Nunilon Monares sa Barangay Kalunasan kinsa mipamatuod nga base sa iyang imbistigasyon nga gihimo dili tinuod nga mipalusot og armas de fuego ang iyang mga basurero alang sa piniriso nga si   Isidro “Botiks” Nudalo.

Sumala pa ni Monares nga iyang nasuta nga wala makahimo og dautang buhat ang iyang mga tawo busa dili niya kini mahimong taktakon sa trabaho.

Sayo niini nakalitan ang mga kadagkoan sa Cebu City Jail sa miaging semana human masuta nga may armas nga nakalusot sa maong prisohan nga usa ka .22 kalibreng armas de fuego alang kang Nudalo.

Nasayran nga ang garbage truck dili na makasulod sa ikaduhang koral sa prisohan ug didto ra kini ipahimutang duol sa cafeteria nga layo kaayo sa selda ni Nudalo.

Sayo niini giangkon ni Nudalo nga siya ang tag-iya sa armas apan giklaro niya nga self-defense ang tumong sa iyang paghupot niini.

Gipahimutang sa isolation cell si Nudalo human sa maong hitabo ug nakadugang sa kabug-at sa iyang kaso ang pagbaton niya og armas (Sanden J. Anadia/WC)

Wala hiilhing tawo gipusil patay sa Dumo Compound

Ni Lesley Caminade-Vestil

Napuno sa samad pinusilan ang lawas patay sa wala hiilhing lalaki kinsa gipaulanan sa mga bala   didto sa Dumo compound sa dalan Abellana, barangay San Roque, ning dakbayan sa miaging kaadlawon.

Ang biktima gihulagway nga nagpangidaron og 30-anyos, gibana-banang 5’6 ngadto 5’7 ang gitas-on nga nagsul-ob og gray nga sleeveless ug black navy pants, ug may   patik sa bukton ug paa. Sa pasiunang imbestigasyon sa kapolisan nasayran nga ang biktima napalgang nagbuy-od ug naglunang sa iyang kaugalingong dugo sa suok nga bahin sa maong lugar.

Matud sa kapolisan, nga ang biktima nakit-ang nagdagan paatubang sa sudlonong lugar sa maong compound kinsa giingong gigukod sa wala hiilhing tawo nga armado kinsa mipusil makadaghan sa biktima nga maoy hinungdan sa hinanaling kamatayon niini. (BANAT NEWS)