Dr. Maamo misil-ing kang Aventurado

CEBU, Philippines - Gibisitahan ni Dr. Marlo Maamo ang regional staff sa Health Assistance Program ni Senador Allan Peter Cayetano ang zoo keeper nga si Ronron Aventurado nga anaa pa sa tambalanan human mapaaki sa kobra didto sa Cebu City Zoo sa miaging adlaw. Si Dr. Maamo nakighinabi usab sa mga health personnel sa Cebu City Medical Center (CCMC) ug mipadayag sa iyang kasagmuyo sa kakuwang sa mga tambal sa maong publikong tambalanan ilabi na sa anti venom vaccine nga maoy tambal kun may mapaakan sa mala nga mananap sama sa kobra.

Si Dr. Maamo misaad sa mga pasyente ug sa mga kawani sa maong tambalanan nga motabang siya aron mapundohan og dako ang maong hospital nga gidumala sa kagamhanan sa dakbayan sa Sugbo gikan sa health assistance program ni Senador Cayetano.

Matud ni Dr. Maamo sa mga tigbalita nga sa pagkakaron ang health care program nila anaa ipunting sa Vicente Sotto Memorial Medical Center.

Gihagit ni Dr. Maamo ang mga opisyal sa syudad nga mangita og paagi nga makabutang gyud og stock nga anti venom vaccine dinhi sa siyudad.

Si Dr. Maamo kinsa mipadayag nga molansar   sa pagka -kongresista sa north district atbang ni kanhi kongresista Raul Del Mar ug sa actress nga si Annabele Rama mipasalig pagpalambo sa health care services program sa dakbayan kun buligan human sa piniliay. (Darrel A. Carumba/WC)

Konduktor giluba patay sa estambay

Namatay   ang usa ka konduktor sa jeep pasaheroan human dunggaba sa gikalalis niyang estambay didto sa terminal sa barangay Poblacion, siyudad sa Danao kagahapon sa ala 1:23 sa kaadlawon.

Ang biktima mao si Renante Alvares, 29, minyo, molupyo sa barangay Laaw, lungsod sa Borbon ug konduktor sa PUJ. Samtang ang suspek mao si Joseph Tito, hingkod, nga taga barangay Quisol siyudad sa Danao apan kasamtangang nagpuyo sa barangay Guinsay.

Si PO2 Roselo Campo sa Danao City Police Station mibutyag sa Banat News nga ang biktima nga nagpaabot sa ilang biyahe nianang kaadlawon nagkalalis ug ang suspek nga nag-estambay sa maong lugar.

Dihang gilupig sa katarungan ang suspek, dali kining milanit    sa iyang kutsilyo ug gidunggab ang biktima

Ang drayber nasabak sa walang bahin sa dughan ug walang bahin sa bukton.

Ang biktima daling gihatud ngadto sa Danao District Hospital apan gideklarar sa mga doktor nga dead on arrival (DOA). Samtang ang mga polis nga mirespondi nakapunit og kutsilyo sa dapit nga nahitaboan nga gituohang maoy gigamit sa maong krimen. (  /WC) (BANATNEWS)