Gwen mosuporta gihapon sa PCL

CEBU, Philippines - Human sa mabulokong kalihokan sa PCL Visayas Wide Congress nga gipaluyohan sa kagamhanan sa lalawigan sa Sugbo si Governor Gwendolyn Garcia subli nga mipadayag nga padayon niyang suportahan ang mga kalihokan sa Philippine Councilors League (PCL) Cebu Chapter.

Kini aron magmalampuson gihapon ang ipahigayong PCL Month ug General Assembly dinhi sa Sugbo karong Disyembre ning tuiga.

Ang pasalig sa gobernador gihimo human mangayo kaniya og suporta ang pangulo sa PCL Cebu Chapter nga si provincial board member Ivy Durano Meca.

Si Meca nga sakop sa Bakud Party wa magpanuko pagduol sa gobernador dala ang resolution sa PCL nga nangayo sa suporta sa gobernador kay gusto kini nga malampuson ang ilang kalihokan sa Disyembre dinhi sa Sugbo. Gumikan niini gisaaran ni Garcia nga hatagan niya og P1 milyon nga hinabang ang PCL.

 Gawas sa maong kalihokan gitakda usab nga makigkuyog ang gobernador sa mga opisyal sa PCL sa pagpang-apud-apod unya sa mga TV;DVD player ug mga DVD educational material alang sa 1,510 ka mga day care center sa tibuok lalawigan.

Nasayran usab nga misugot na ang tagdumala sa Cebu International Convention Center nga mogamit sila og mga lawak niini alang sa ilang klase karong Agosto 22 – 26 sa PCL Legislative Academy uban ang University of Makati.    - BANAT NEWS