Gob. Garcia nangaliya kang Beato Calungsod
CEBU, Philippines - Gipangaliya ni Gob. Gwendolyn Garcia ngadto kang Beato Pedro Calungsod nga unta libkason sa Sandiganbayan ang giluwatan nga hold departure order (HDO) batok kaniya.
Kini aron makarepresentar siya sa Probinsiya sa Sugbo atol sa kanonisasyon sa Sugbuanong Santo karong buwan sa Oktobre didto sa Roma.
Matud pa ni Garcia nga hugot ang iyang pagsalig nga pinaagi sa pag-ampo mabatukan ang mga dautan nga mitamastamas kaniya sa politika.
Si Garcia nalutsan og HDO sa niaging adlaw kauban sa laing pito ka opisyal sa Kapitolyo may kalambigitan sa kasong kriminal nga ilang giatubang gumikan sa giingong anomalosong pagpalit sa luna sa mga Balili sa dakbayan sa Naga niadtong tuig 2008.
Ang kamandoan nagdili kang Garcia ug kaubanan sa paglarga gawas sa nasud kung walay pagtugot sa korte.
Matud pa ni Garcia nga nagtoo silang daan nga mogawas gyud ang maong kamandoan maong miduso sila og motion for reconsideration ug motion to suspend proceedings nga giuyonan sa Sandiganbayan.
Nanghinaut si Garcia nga pabor kaniya ang laing motion for reconsideration batok sa HDO nga ilang giduso.
“As it is now, well, kung naa ko’y hold departure, ari lang gyud ko kuyog sa akong mga pinalanggang Sugbuanon, dili lang gyud ko mobiya ninyo,” sumala pang Garcia.
Laing giluwatan og HDO sa Sandiganbayan mao sila si kanhi bokal Juan Bolo; provincial assessor Anthony Sususco isip chairman sa Cebu Provincial Appraisal Committee (CPAC) ug iyang mga sakop nga sila si provincial treasurer Roy Salubre ug assistant provincial engineer Eulogio Pelayre; budget officer Emme Gingoyon; ug pribadong mga indibidwal nga sila si Amparo ug Romeo Balili.
Piyansado hinuon ang mga akusado human gipasaka sa Ombudsman ngadto sa Sandiganbayan ang kasong pagpangawkaw. - BANAT NEWS
- Latest
- Trending
