DA mosulbad sa problema sa tubig sa Barili farmers

CEBU, Philippines - Ang Department of Agriculture mipahibalong motabang og sulbad sa problema sa irigasyon o patubig sa lungsod sa Barili tungod sa kausaban sa direksyon sa tubig sa Mantayupan River nga naigo sa sink hole.

Ang mga mag-uuma diha sa maong lungsod mireklamong wala nay tubig nga modagayday sa ilang mga umahan tungod sa sink hole. Hinuon nabalik na ang tubig sa Mantayupan Falls pinaagi sa paghimo og laing agianan sa tubig aron dili na moagi pa sa sink hole.

Apan kini nakaapekto sa naandang agianan sa tubig sa irigasyon sa mga umahan sa maong lugar.

Niadtong tuig 1985 gitukod ang Communal Irrigation System (CIS) sa Barili nga ang tubig gikan sa Mantayupan River nga gipasiugdahan sa National Irrigation Administration (NIA) alang sa programa pagpalambo sa agrikultura.

Ang nakabenepisyo sa maong irigasyon mao ang tulo ka mga barangay nga mao ang Campangga, Daro ug Napo nga dunay 170 ektarya nga dunay 155 ka mga mag-uuma nga benepisyaryo.

Base sa report sa DA nga ang Mantayupan CIS usa sa dakung irrigation system nganhi sa probinsiya nga nakatabang ngadto sa mga umahan sa humay.

Ang mga humayan nga nalakip sa maong irrigation maka-harvest kini og 95 kaban nga humay matag ektarya.

Ang kagamhanan sa Barili mihimo og pasiunang solusyon sa problema pinaagi sa pagtam-ok og mga filling material ngadto sa sink hole apan wala gihapon kini makakompleto og tabon sa dakung lungag.

Gibutangan hinuon nila og sandbags ug sa paglungag sa tuong bahin sa daplin sa sapa aron ang tubig mobalik sa iyang orihinal nga rota o dili kini masuyop sa dakung lungag.

Apan nasuta sa DA nga ang maong pamaagi temporaryo lang ug kung dunay kusog nga baha mabanlas ra ang sandbag. Ang NIA nagplano kini sa pagtakub sa sink hole pinaagi sa pagbutang og boulders ug concrete slab, giingong moabot sa P450,000 ang budget nga kinahanglanon niini. (Brenda D. Batuto/EIM) (BANAT)