Babayeng 'pusher' nadakpan
CEBU, Philippines - Ubay-ubay nga drugas nga mokantidad og P20,000 ang nakuha gikan sa usa ka gipasanginlang drug pusher sa gipahigayong buy-bust operation niadtong Martes sa hapon sa Barangay Looc siyudad sa Danao.
Ang Provincial Anti-Illegal Drugs Special Operation Task Group nga gipanguluhan ni SPO1 Francis Alen Villamor miaresto ni Cecilia “Celia” Gonzaga, 41, gawas sa panimalay niini human makompleto ang transaksyon.
Gamit ang P200 marked money, si Gonzaga giingong mitunol og usa ka gamay nga pakete sa drugas ngadto sa poseur buyer.
Human gyud sa transaksyon daling giaresto si Gonzaga ug nakuhaan kini og laing 23 ka shabu ug usa ka bultong shabu nga gibanabana nga mokabat og P9,600.
Gidala na sa buhatan sa Philippine National Police Crime Laboratory-7 sa Camp Sotero Cabahug ang mga ebidensiya alang sa chemical analysis. Si Gonzaga giingong makabaligya og 25 gramos nga shabu sulod lang sa duha ka adlaw. Anaa usab siya sa watch list sa Provincial Intelligence Branch.
Si Pedro Gonzaga, bana sa suspek, nadakpan na usab sa PIB pinaagi sa susamang operasyon sa Camotes Island tulo na ka-tuig ang milabay. Human madakpi ang bana mihunong si Cecilia sa pagpamaligya og ilegal nga drugas apan giingong mibalik na usab sulod sa tulo na ka tuig.
Si Pedro anaa na karon sa Cebu Provincial Detention and Rehabilitation Center. Si Villamor nagkanayon nga susihon una nila sa korte sa Danao City kung nalutsan na ba og warrant si Cecilia.
Kalapasan sa Section 5 ug 11 sa RA 9165 ang ipasaka sa operatiba batok kang Cecilia nga anaa na karon sa karsel sa Minglanilla Police Station. (Ria Mae Booc/EIM) (BANAT)
- Latest
- Trending
