2 nangawat og 15 ka igtatari tiklo

CEBU, Philippines - Nadakpan sa kapolisan ang duha sa tulo ka mga suspetsadong kawatan nga mikawat sa kinse ka manok igtatari nga gipanag-iya og doktor didto sa Sitio Balubogan, lungsod sa Pinamungahan kagahapon sa alas 7:00 sa buntag.

Ang biktima nga tag-iya sa mga manok mao si Romulo Delos Reyes, 53 , caretaker sa Seaside Haven Beach Resort nga gipanag-iya ni Dr. Eduardo Sacris.

Ang duha sa tulo ka mga nadakpang suspek mao sila si Edmer Sabedoria, hingkod , ug Lionel Canalita, 27 , nga pulos mga molupyo ra sa maong lugar, ug ang ikatulong suspek nga   wala hidakpi mao si Jovanie Nemenzo.

Si SPO1 Uldarico Nengasca sa Pinamungahan Police Station mibutyag sa Banat News nga niadtong Biyernes sa alas 9:00 sa gabii nananghid kaniya ang suspek nga si Sabedoria nga ilang kawaton ang linya sa Globelines nga nag-agi sa ilang lugar.

Matud niya nga nakugang na lang siya dihang iyang namat-an pagka- Sabado sa buntag nga nahanaw na ang 15 ka mga manok nga igtatari kauban sa linya sa Globelines hinungdan nga ila dayong gireport sa kapolisan.

Atol sa hot pursuit operation nasikop sa mga polis ang suspek nga si Sabedoria ug nabawi gikan   niini ang duha na lang ka manok igtatari.

Dihang giimbistigar gibutyag niini ang iyang duha ka kaubang kawatan busa gisikop dayon sa kapolisan   si Canalita apan nakasibat si Nemenzo.

Nagtingkagol na sa prisohan ang duha samtang padayon pang gipangita si Nemenzo ug ang kiha giandam na sa kapolisan nga ipasaka batok kanila. (BANAT NEWS)