CEBU, Philippines - Usa ang patay samtang duha ang naangol kinsa pulos walay helmet human mosaliring kay nakaligis og bato ang habal-habal nga ilang gisakyan didto sa bukirang bahin sa barangay Panadtaran lungsod sa San Fernando kagahapon sa alas 12:00 sa udto.
Ang nakabsan sa kinabuhi usa ka babaye kansang ngalan wala pa makuha sa kapolisan sa San Fernando kagahapon sa pagkuha ning maong balita.
Samtang ang naangol mao si Primo Restauro, 71, byudo nga taga barangay Alpaco sa siyudad sa Naga ug si Generoso Candilanta, 55, byudo nga taga barangay Tabyonan, San Fernando.
Si PO1 Janel Sigura sa San Fernando Police Station mibutyag sa Banat News nga ang maong biyahe gikan sa barangay Magseko sa maong lungsod ug gipakyaw sa duha ka pasaherong biktima paingon sa Poblacion sa maong lungsod.
Apan samtang nagdagan ang motor, nakaligis kini og dakong bato sa karsada hinungdan nga mibaliwliw kini ug natumba sa yuta ug nalabay ang mga biktima.
Ang babaye namatay diha-diha human mabusdak sa batoon nga karsada ang ulo niini.
Si Restauro ug si Candilanta wala maintimano kay bisan walay mga helmet apan wala mabusdak sa mga bato ang ilang ulo apan nangapiang ug nangasamad ang ilang kalawasan.
Ang mga angol gidala dayon sa tambalanan sa lungsod. (BANAT NEWS)