Biyuda gitulis gipatay

CEBU, Philippines - Usa ka 64 -anyos nga biyuda ang nakit-an patay na diha sulod sa lawak sa iyang balay diha sa barangay Basak Mercado sa dakbayan sa Lapulapu kagahapon sa buntag.

Ang biyuda nailhan nga si Ligaya Dungon, pensyonado ug dealer sa mga pampaanyag ang nakit-an nga may gibaat nga panapton sa iyang nawong ug nagkadugo.

Ang 19-anyos nga apo nga si Ian Tampus nga mibisita kaniya kagahapon sa buntag maoy nakakaplag kaniya kinsa maoy mitawag sa mga iyaan ug sa kapolisan.

Matud pa sa kapolisan si Tampus nahibulong nganong wala motubag ang apohan sa iyang pagsampit ug abli na ang pultahan sa balay niini ug nagkaguliyang na ang mga gamit.

Dihang iyang gisusi ang lawak sa apohan nakit-an niya kining nagkulob nga wala nay sapot ug bra na lang. Gibaatan usab sa bathrobe sa biktima ug gisapawan og duha ka laing panapton ang nawong ug nagkadugo usab ang pribadong parte sa lawas niini.

Daling nangayo og tabang sa mga iyaan kinsa daling mitawag sa kapolisan pinangulohan ni SPO1 Allan Pantaleon.

Nagtuo ang kapolisan nga nangukay una ang kawatan una kini nangawat ug mga gamit sa biktima sanglit nagkagubot naman ang mga butang sulod sa panimalay. Gituohang diha moagi sa gitangtang nga kahoy sa bintana sa kwarto ang mga kawatan.

Si Insp. Precilo Libato, Scene of the Crime Operation team leader mirekomendar nga ipaawtopsiya ang patay’ng lawas aron hisayran ang hinungdan sa kamatayon niini ug masusi kun gilugos ba kini.

Ang anak sa biktima nga si Archie Dungon, 33, mipadayag nga way kontra sa ilang dapit ang iyang inahan, nangawala usab ang bag ug duha ka cellphone sa iyang inahan. Giingong ikatulo na kini ka higayon nga gikawatan ang biktima.

 (/EIM)(BANAT NEWS)