Winner sa Pasigarbo sa Sugbo gigantihan

CEBU, Philippines - Nakadawat na sa ilang tagsa-tagsa ka ganti ang mga mananaog sa ika-lima nga Pasigarbo sa Sugbo Festival of Festivals atol sa awarding ceremony didto sa Cebu International Convention Center(CICC) sa miaging gabii.

Unang nakadawat og premyo mao ang mga mananaog sa Andas competition.

Nag-una mao ang Palawod Festival sa Bantayan nga nakadawat og ganti nga P50 mil; ika-duha mao ang Panagtagbo Festival sa Mandaue, P40 mil; ika-tulo Sinulog sa Carmen, P30 mil; ika-upat Sarok Festival sa Consolacion, P20 mil ug ang ika-lima Kabkaban Festival sa Carcar City, P10 mil. 

Ang ikaduha nga gihatag mao ang mga premyo sa mga mananaog sa Decorated Auto-Van Competition.

Nag-una ang Palawod Festival nga nakadawat og P100 mil; ika-duha Kabkaban Festival, P80 mil; ika-tulo Bonga Festival sa Sibonga, P60 mil; ika-upat Isda Festival sa Madridejos , P40 mil; ug ang ika-lima Hinulawan Festival sa Toledo City, P20 mil.

Laing P200 mil ang nadawat sa Palawod Festival isip Best in Costume Winner ingon man ang Rosquillos Festival sa Liloan isip Best Arranged Festival Jingle nga nakadawat usab og P100 mil.

Ang mitunol sa maong mga ganti mao sila si Gobernador Gwendolyn Garcia ug Consul Roberto Aboitiz. (BANAT NEWS)