CEBU, Philippines - Gihulagway ni Bise Gobernador Agnes Magpale si Gobernador Gwendolyn Garcia nga madinumtanon human babagi niini ang iyang pagtudlo kang Engr. Gigi Sanchez Zaballero isip consultant sa iyang buhatan.
Gibutyag ni Magpale atol sa interview sa Bantay Radyo nga nagpakita lang kini nga nagdumot gyud ang gobernador sa maong pamilya ug wala gyud malimot bisan paman og mitaliwan na si anhing Bise Gobernador Gregorio Sanchez ang amahan ni Zaballero.
Alang kang Magpale nga angay unta nga kalimtan na ang ilang panagbangi sa kanhi bise gobernador kaniadto apan hangtud diay karon nagpabilin gihapon ug hangtod ang anak sa bise gobernador napagan pa.
Gipasabot ni Magpale nga gikuha niya isip consultant si Zaballero aron makapasawo kini ngadto sa mga mag-uuma sa lalawigan sa iyang kasinatian bahin sa organic farming.
Matud ni Magpale nga gianugonan siya kang Zaballero kay dili ra ba unta kini mangayo og suhol gikan sa goberno.
Gipasabot ni Magpale nga wala gyud siyay laing tumong pagkuha sa serbisyo ni Zaballero gawas sa tinguha nga makatabang lang unta kini sa mga proyekto nga iyang ipatuman ug niadtong nasugdan na ni anhing bise gobernador Sanchez.
Hinuon desidido gihapon ang bise gobernador nga kuhaon niya isip personal consultant si Engr. Zaballero
Samtang si Zaballero sa iyang bahin mipadayag nga wala siya makurat sa reaction ni Gobernador Garcia tungod kay nasinati na siya sa kinaiya niini nga way respeto sa balaod.
`Milab-as sa hunahuna ni Zaballero nga sa buhi pa ang iyang amahan hilabtan sa gobernador ang mga gimbuhaton niini ug bisan ang iyang (Greg) gipanudlo nga consultant napagan pa sa mga pagbabag ni Gobernador Garcia.
Sa bahin sa gobernador gipatigbabaw niini ang iyang katungod nga mao ray may katungod nga maka-hire og consultant sa Kapitolyo base sa local government code. (BANAT NEWS)