CEBU, Philippines - Si Manlalaban Democrito Mendoza kinsa maoy founder sa Associated Labor Union-Trade Union Congress of the Philippines (ALU-TUCP) usa sa mga gihatagan og pasidungog sa ika-443 nga Garbo sa Sugbo karong tuiga nga gipahigayon sa Cebu International Convention Center (CICC) sa dakbayan sa Mandaue sa miaging gabii.
Giila sa kagamhanan sa lalawigan sa Sugbo ang kalampusan ni Mendoza sa iyang adbokasiya sa pagpabarog sa katungod sa mga mamumuo dinhi sa nasud.
Si Gobernador Gwendolyn Garcia maoy nangulo sa paghatag og pasidungog kang Mendoza, uban ni 3rd District Congressman Pablo John Garcia ug uban pa nga mga bisita.
Ang uban nga nakadawat og pasidugog mao sila si Enrique Benedicto nga maoy honorary consul sa Belgium nganhi sa Sugbo nga giila sa iyang nahimo bahin sa international relations, Roberto Aboitiz nga honorary consul sa Netherlands nga giila usab sa natad sa social and community development, Dr. Melquiadito Allego nga giila sa iyang natampo sa pagpreserbar sa Cebuano literature, Atty. Augusto Go, consul general sa Republic of Korea ug presidente sa University of Cebu nga giila usab ang iyang mga nahimo sa pagpalambo sa natad sa edukasyon dinhi sa Sugbo.
Jose Eleazar Bersales nga giila sa iyang nahimo alang sa pagpreserbar sa Cebuano culture and heritage dinhi sa lalawigan, Joseph Yap nga presidente ug executive officer sa Filinvest Land Inc., alang sa corporate leadership.
Samtang ang Governor’s citation gihatag usab ngadto kang Dennis Sugarol sa pagdumala sa tulo ka mga choir sa Sugbo nga nakaangkon og mga kadaugan sa mga indigay nga lokal ug ngadto sa gawas sa nasud.
Si Cong. PJ Garcia sa iyang welcome message iyang gipadayag nga ang CICC maoy nagsimbolo sa dinagko nga kaakohan sa mga Sugboanon nga naghatod sa kalamposan ngadto sa kalibutanong kadungganan. (BANAT NEWS)