Amahan naghikog daplin sa dagat

CEBU, Philippines - Patay nang nahauli sa ilang panimalay ang usa ka amahan human kini napalgang nagbitay sa usa ka kahoy nga tugas pasado alas-10 sa buntag kagahapon sa sitio Camarin sa barangay Bonbon lungsod sa Aloguinsan.

Ang biktima nailhan nga si Pedro Aparicio, 46, molupyo sa maong lugar ang napalgan nga wala nay kinabuhi daplin sa baybayon.

Sa pakighinabi sa Banat News ni PO2 Solomon Cordoza Jr. sa Aloguinsan Police, misaysay nga ang managhigalang Rosalinda Bayadog ug Marlen Obtina maoy nakakita kang Aparicio nga nagbitay sa tugas.

Matud pa ni Cordoza niadto pang Biyernes gipangita sa iyang asawa si Aparicio human kini nanaghid nga mangumpay apan Sabado nalang wala gihapon kini mouli.

Dugang pa ni Cordoza nga base sa gibutyag sa asawa sa namatay nga daan nang adunay nervous breakdown ang bana niini ug problemado usab sila sa kwarta. (BANAT NEWS)