Rambol sa bar 7 sikop

CEBU, Philippines - Gitanggong sa detention cell ang lima ka tawo uban sa usa ka langyaw ug uyab niining Filipina tungod sa nahitabong karambola sulod sa usa ka bar sa barangay Subangdaku sa dakbayan sa Mandaue kagahapon sa kaadlawon.

Ang gipangdakop sa kapolisan mao sila si Bibit Paul Lambrix, 30, nga usa ka Amerikano ug hinigugma niining si Maria Bella Melesco, 30, taga barangay Canjulao sa maong dakbayan.

Dugang sa gidakop mao sila si Martin Palcon, 27; Ritchie Andama, 24; John Llyod Villaro, 25; Jeje Ledres, 29; ug Ariel Josol, 40, pulos nagpuyo sa barangay Hipodromo sa dakbayan sa Sugbo.

Si PO2 Gilbert Igot sa Presinto 2 nga nahinabi sa Banat News mitug-an nga naglingkod sa pikas lamesa ang manag-uyab dihang kalit giduol ni Josol si Melesco ug giwakli ang gisul-ob niini nga kawo.

Tungod niini nasinta ang uyab niining si Lambrix mibarog ug gibadlong si Josol apan gikatahong nasuko si Palcon ug gisitar usab niini ang langyaw hinungdan nga gituok kini sa naulahi.

Sunod nga nahitabo mao ang karambola diin giingong gibunalan og botelya ni Josol ang langyaw nga nakaingon sa pagkasamad niini.

Si Biato Solano nga maoy nagdumala sa maong resto bar daling mitawag sa kapolisan hinungdan sa pagkasikop sa mga nagkarambola. Si Lambrix gidala sa Mandaue City Hospital gipatambalan.Ang langyaw nagplano nga mopasaka og kasong physical injuries batok sa lima. (BANAT NEWS)