CEBU, Philippines - Naugdaw ang usa ka bus pasaheroan nga gipanag-iya sa Sunrays Bus Liner dihang nasunog kini samtang paingon na untang mobiyahe gikan sa garahian sa ilang kompanya sa Barangay Liloan lungsod sa Santander niadtong Sabado sa alas 7:30 sa buntag.
Ang maong bus gilimpyohan na unta aron mobiyahe anang buntaga paingon sa siyudad sa Sugbo apan sumala pang PO2 Anthony Aba sa Oslob Police Station base sa nakuha nilang impormasyon kalit lang kining misilaob.
Wala na mapugngi ang kalayo nga nikaylap dayun sa tibuok sakyanan hinungdan nga mitawag sila sa Oslob Fire Station nga gipangulohan ni FO1 Pitz John Romeo Rollon kinsa miresponde apan naugdaw na gyud ang tibuok bus.
Hinuon walay laing sakyanan nga nadaot ug walay nakalas ug naangol atol sa hitabo.
Sa pasiunang imbestigasyon gituohan nga grounded ang battery niini ug nabasa dihang gibanwasan og tubig sa naglimpyo niini maoy nakaingon sa pagsilaob.
Sa paghimo ning balita wala pa mabanabana sa kabomberohan sa Oslob sa kinatibuk-ang danyos tungod kay gipaabot pa nila ang report gikan sa insurance niini.
(BANAT NEWS)