Vanity plates ug dark glasses

CEBU, Philippines - Ang kadagkoan sa Land Transportation Office (LTO) mihatag og kamandoan sa iyang mga road law enforcers nga hugtan ang pagpanakop sa mga drayber sa sakyanan nga migamit og Vanity ug Commemorative Plates nga gitaptap sa plate numbers sa atubangang bahin sa sakyanan.

Si LTO-7 Regional Director Raul Aguilos miawhag sa mga tag-iya ug drayber sa mga sakyanan nga mitabon ug mitangtang sa original plates sa atubangan nga ibalik nila ang “original plates” mintras wala pa sila madakpi.

Matud ni Aguilos nga bisan ang mga tinugyanan sa balaud dili “exempted” sa pagpatuman sa balaud. Lakip sa mga pangdakpon mao kadtong mga migamit og plaka nga “PNP 111,” “LTO 100,” “NBI-75,” “PMA-PNPA” ug uban pa.

Gipasabot ni Aguilos nga ang mga tag-iya og sakyanan wala did-i sa paggamit niining maong mga vanity plates apan dili gyud kini itabon o ipuli sa original plate numbers.

Ang mga vanity ug commemorative plates mahimo nga gamiton apan igo lang ibutang sa ibabaw o kaha tupad sa original plate numbers sa atubangan. Kadtong madakpan sa mao nga kalapasan mag-atubang og multa nga P5,000.

Nabantayan nga pwerteng daghana karon nga mga sakyanan nga nagtangag og vanity plates sa atubangan nga klaro kaayo nga nakasupak na sa gimbut-an sa balaud.

Ang balaud nga gilatid sa Transportation and Traffic Code nagmando nga ang sakyanan nga magdagan sa karsada kinahanglang adunay plate numbers sa atubangan ug sa luyo. Gitumong kini aron nga kon makasugat og aksidente mailhan ang maong sakyanan nga nakahimo og salaud.

Nabantayan usab sa mga road law enforcers nga daghan pa nga mga sakyanan nga gitaptapan og “dark glasses” ang plate numbers.

Samtang wala did-i ang ang mga motorista sa pagbutang og protektors sa ilang plate numbers, apan dili kadtong mga “dark colors” nga lisud na mabasa ang plate numbers.

Naingon niini ang sitwasyon nga midaghan ang mga motorista nga nagtabon sa ilang plate numbers ug dark glasses ug migamit og mga vanity plates sa atubangan nga gipuli sa ilang original plate numbers kay ang mga traffic enforcers dili man manakop sa maong kalapasan.

Nasayran nga ang sagad migamit niining maong mga vanity plates nga NBI 75, PNP 111, LTO 75, PMA-PNPA dili mga polis ug tinugyanan sa balaud, kay nasuta nga mga tawo sila nga gusto ra magpatoong sila awtoridad.    - BANAT NEWS