BARKADA mituboy ni Maamo kontra del Mar

CEBU, Philippines - Gituboy sa Barangay Kagawad sa Dakbayan (BARKADA) ang kandidatura ni Dr. Marlo Maamo nga moatbang kang kanhi kongresista Raul del Mar pagka- kongresista sa north district ning dakbayan sa Sugbo sa eleksiyon sunod tuig. Atol sa gipatawag nga tigum sa Barkada niadtong miaging udto ilang gisugyot nga mahilakip si Dr. Maamo sa selection process sa Team Rama aron usa sa mamahimong pilian nga kandidato pagka kongresista atbang ni kanhi kongresista Del mar. Si kanhi Kong. Del Mar maoy mohulip sa iyang anak nga si Kong. Cutie Del Mar nga maoy manok sa Bando Osmeña Pundok Kauswagan (BOPK) nga gipangunahan ni Kongresista Tomas Osmeña kinsa mokandidato sa pagka- mayor sa dakbayan sa Sugbo atbang ni Mayor Michael Rama.

Si Edgar Dela Calzada, kagawad sa barangay Sta Cruz ug maoy usa sa nagpasiugda sa maong tigum mihangop sa health care program nga adbokasiya ni Dr. Maamo kun kahatagan kini og higayon nga makalingkod sa kongreso isip representante sa north district.

Gawas sa gibana -banang kapin sa 30 ka mga kagawad gikan sa lain-laing barangay sa amihanang distrito nga mitambong sa maong miting, may   pipila ka mga kapitan nga nakig-uban kanila sama kang Sta Cruz barangay Captain Gerome Lim ug Kalubihan barangay Captain Carmilo Milan. Si Kapitan Lim nga nahinabi sa Banat News miingon nga nakadayeg siya sa gi-presentar nga programa ni Dr. Maamo nga motutok sa pag-atiman sa kahimsog sa panglawas sa mga molupyo sa north district nga maoy nag-unang gikinahanglan sa pagkakaron.

Gani matud ni Lim   nga gipul-an na sila sa mga infrastructure project ni kongresista Del Mar sama sa pagmugna og daghang flyover nga moresulta sa paghuot sa lugar ilabina sa ilang barangay nga gamay ra ang lugar. Si kagawad Dela Calzada maoy mihangyo ni Dr. Maamo nga makig-alayon kang Mayor Rama aron ma-apil sa selection process tungod kay hangtud karon wala pa silay nakit-ang klarong kandidato nga moatbang ni Del Mar. Si Dr. Maamo sa iyang bahin wala mosalikway sa maong posibilidad basta managsama lang ang ilang adbokasiya nga magtutok sa kahimsog sa panglawas.

Prayoridad niya ang pagbutang og dugang 3 ka satellite hospital sa north district aron pagpaluag sa naghuot na nga mga pasyente sa Cebu City Medical Center (CCMC) kun molampus sa iyang tinguha.

Niadtong niaging semana kapin sa 50 ka mga grupo sa urban poor group sa north district ang mituboy usab sa kandidatura ni Dr. Maamo .    - BANAT NEWS