Pagpangrakrak mag-uuma naangol

CEBU, Philippines - Usa ang naangol sa pagpangrakrak didto sa bukirang bahin sa Sityo Malacurong barangay Usmad, lungsod sa Argao niadtong Biyernes sa hapon.

Ang biktima mao si Juliano Aballe, 21, ulitawo, nga taga barangay Cansuje , mag-uuma, samtang ang mga suspek mao ang magsuon nga si Lorenzo Dayagonon alyas Ensoy, ug ang iyang manghud nga si Wily Dayagonon, pulos taga Canbanwa , Argao ug si Gemar Fuentes, hingkod, nga taga Ubaob, Argao giingong barkada sa managsuon.

Si PO2 Benjamen Gerozaga, desk officer sa Argao Police Station mibutyag sa Banat News nga ang biktima nakig-estorya kang Gerco Bajenting, 56, sulod sa tindahan niini (Bajenting) dihang kalit lang miabot ang mga suspek nga pulos armado dayong rakrak sa ilang mga armas de fuego ug diha-diha  nasabak ang tuong kamot ni Aballe.

Samtang si Bajenting kinsa giingong maoy target sa mga suspek mikabad og dagan pahilayo sa iyang tindahan ug wala maigo.

Matud pa ni PO2 Gerozaga nga gigukod sa mga suspetsado si Bajenting nga gipauwanan sa mga bala apan tungod sa kakusog nga midagan niini, wala gayud hiapsi sa mga kriminal.

Matud ni PO2 Gerozaga nga panimawos ang motibo sa maong krimen kay si Lorenzo giingong napusilan sa miaging Martes ni Jasper Bajenting, anak  ni Gerco Bajenting ug naigo kini sa bukton apan wala mokiha. Ang kapolisan padayong nagpangita sa mga suspek karon.    - BANAT NEWS