Nangmolestiya gitabanga'g luba

CEBU, Philippines - Usa ka shell craft worker ang talandugon ang kahimtang sulod sa tambalanan human gitabangan og dunggab sa iyang amo ug laing upat ka wala mailhing tawo pasado ala-una kaganihang kaadlawon diha sa Alaska- Mambaling sa syudad sa Sugbo human mahibaw-ing gilugos sa biktima ang anak sa agalon.

Ang biktima nailhan nga si Marlon Degamo, 26, kanhi shell craft worker ug lumad nga taga Getafe, Bohol samtang ang gitumbok nga suspetsado mao ang amo niining si Dandan Nadera ug laing upat ka wala mailhing lalaki.

Sa pasiunang imbestigasyon sa kapolisan ang biktima natulog sa usa ka payag nga kasamtangan niyang gipuy-an sa maong dapit dihang gisulod kini sa mga suspek ug gipukaw.

Dihang nakamata gitabangan kini og duslak sa maong mga lalaki, usa kanila nailhan niyang mao ang iyang kanhi agalon tungod kay misulti kining “rapist ka!” samtang nagpunay og dunggab kaniya uban sa upat ka lalaking wala mailhi. Sa pagtuong patay na kini migawas ang lima ug miikyas. Ang biktima daling nakapangayo og tabang sa mga silingan ug gidala sa Cebu City Medical Center.

Nasayran usab sa kapolisan nga ang biktima giakusahan diay sa iyang amo nga mimoletsya sa menor de edad niining anak pipila ka adlaw na ang milabay.

Ang hepe sa kapolisan sa Cebu City Police Office, Homicide Section nga si Jul Mohammed Jamiri mibutyag nga gipapahawa sa suspek nga agalon ang biktima sa trabaho human niini mahibaw-i ang gibuhat niini ngadto sa iyang anak.

Apan matud pang Jamiri kusganong mihimakak ang biktima sa alegasyon batok kaniya. ( /EIM)