2 na ang namatay sa garbage truck

CEBU, Philippines - Namatay usab diha sa tambalanan pasado alas 4:00 sa hapon niadtong Huwebes ang laing mamasurahay kinsa naapil sa pagkatuwad sa garbage truck sa dakbayan sa Talisay sa nahisgutang adlaw didto sa barangay Tapul.

Ang patay nang nadangat diha sa Vicente Sotto Memorial Medical Center mao si Ricky Lapinid kinsa giingong nakaangkon og grabeng kadaot sa lawas.

Samtang ang garbage collector nga job order sa city hall sa Talisay nga si Paterno Cañedo mao karoy kritikal nga kahimtang tungod sa pagkaliki sa ulo niini.

Kahinumduman nga ang mga nabiktima sa pagkatuwad sa Canter mini dump truck nga nagtangag sa plakang SHT-727 mao sila si Jerome Miaso, kinsa namatay ug kritikal pa niadto si Lapinid ug naangol usab ang ilang kauban nga si Renante Abatayo.

Si Miaso, Lapinid ug Abatayo parehong mga mamasurahay kinsa mi-hitch ride sa garbage truck. Laing mga biktima mao ang drayber nga si Dante Olid ug ang duha ka garbage collector nga sila si Ramil Amagos ug Cañedo.

Si Edwin Nierves, hepe sa Ecological Solid Waste Management Collection mibutyag sa Banat News kagahapon nga si Cañedo nakaangkon kini og liki sa iyang ulo.

Matud pa niya ang mga mamasurahay mangatang diha pa sa barangay Maghaway aron makauna sa ubang mga mamasurahay.

Gidili kini kaniadto pa apan duna gihapoy mohimo niini.

Kagahapon sa buntag si Nierves miadto sa landfill sa Tapul ug nakigtigom sa tanang mamasurahay ug miawhag sa barangay nga mopasar og resolusyon nga magdili kanila mga manakay sa trak ug pagdili sa mga bata sa landfill. ( EIM)   - BANAT NEWS