Midagan sa p2.8m mitahan

CEBU, Philippines - Boluntaryong mitahan sa iyang kaugalingon niadtong Huwebes ngadto sa kapolisan ang gwardiyang gipasanginlang midagan sa kapin P2 milyones nga kwartang gipanag-iya sa Philippine Amusement and Gaming Corporation sa Park Mall satellite branch niini sa dakbayan sa Mandaue.

Si Pascual Urian Jr. 29, lumad nga molupyo sa maong lugar ang mitahan sa kapolisan sa Panay niadtong Huwebes human siya makombinsir sa paryenteng polis.

Sa pakighinabi ni Chief Inspector George Ylanan sa Regional Special Operations Group misaysay kini nga si Urian daan nang mipadala og ‘surrender feelers’ apan nahadlok kini tungod sa iyang seguridad.

Human pasaliging walay dautang mahitabo kaniya iyang gitudloan ang kapolisan kung asa siya magtago, human niini gidala siya sa police station.

Matud pa ni Ylanan nga dihang ilang nasayran nga mitahan na si Urian sa Panay dali silang miadto sa Capiz City ug gidala kini kagahapong adlawa dinhi sa Sugbo.

Giuli usab ni Urian ang P1.4 milyones nga giingong mao ray nabilin sa P2 milyones nga nadala niining kwarta niadtong Hulyo ning bulana gikan sa gitrabahoang satellite casino sa Pagcor diha sa Mandaue City.

Sumala pang Ylanan si Urian mitug-an nga P2.8 milyones ang nadala niining kwarta. Giangkon usab niining wala dayon kini molayas sa Sugbu ug naglaroylaroy lang siya sa dalan Colon, barangay Lorega-San Miguel ug Carreta aron magduwa og video karera ug paggamit og ilegal nga drugas.

Dugang pa ni Ylanan nga mi-check in pa si Urian sa usa sa mga lodging houses sa dalan Colon apan mibiya kini human dunay nakamay-ong kaniya ug nakadesisyon nga mosakay og bus padulong sa Oslob ug mitabok ngadto sa Dumaguete City sa Negros ug mibiyahe padulong sa Panay.

Si Ylanan nagkanayon nga na-pressure og maayo si Urian sa iyang mga paryente ilabi na niadtong mga paryente niyang mga polis nga miapil sa pagpangita kaniya.

“Nagkagamay na ang kalibutan ni Urian,” maoy paghulagway ni Ylanan sa gibati sa suspek samtang nagtagotago.

Ang mga sakop sa Mandaue City Police Office Investigation and Detective Management Branch gipanguluhan ni Chief Inspector Mike Bastes didto mipwesto sa Bohol human ilang nasayran nga ang inahan niini atoa na magpuyo sa Talibon.

Samtang ang ubang team sa kapolisan tua usab sa Dapitan human adunay nakuhang impormasyon nga taga didto ang uyab niini samtang ang uban didto nangita kaniya sa Capiz ang lugar nga natawhan ni Urian.

Butyag pa ni Ylanan susama ra sa dili na makalihok si Urian tungod sa pagpunay niini og tagotago sa Panay tungod usab kay ang hepe sa Panay Police Station nga si Insp. Bryant Fallera magpunay man usab og panukit-sukit sa kasilinganang lugar kabahin kaniya.

Si Urian nga gisuwayan unta sa pagkuha sa iyang habig, igo lang kini nga mibutyag nga “dili lang ko magpainterbyu.”

Matud pa ni Ylanan nga wala pa usab mibutyag si Urian kun unsay hinungdan nga nabuhat niya ang pagdagan sa maong kwarta.

Samtang ang kadagkuan sa PAGCOR nga gipanguluhan ni General Manager Roque Cervantes mapasalamaton sa kapolisan nga nasikop na gyud si Urian. Ang Satellite Casino Manager nga si Renato Osmeña Jr. mapasalamaton usab nga wala gayuy nahitabo sa pagdala ni Urian sa Sugbo ug sa nabuhat sa kapolisan.

“Thank God nga he surrendered. We are so fortunate nothing happen all the way,” pasabot pa ni Osmeña kinsa mipasabot nga duna na silay higpit nga seguridad nga ipatuman aron di na mausab ang maong hitabo.

“Lapses were corrected, safety measures to ensure this will not happen again. Justice will always prevail,” saysay pa ni Osmeña. (/EIM)   - BANAT NEWS