Indian kidnap-victim sa ASG nakaeskapo
CEBU, Philippines - Usa sa mga langyaw nga gisignit sa Abu Sayyaf gang nga konektado sa al-Qaida terror group ang nakaeskapo human sa dul-an 14 ka bulan gikan kini gi-kidnap.
Ang nakaeskapo sumala pa sa report sa Associated Press mao si Bijo Kolara Veetil kinsa nakahigayon pag-ikyas sa kota sa mga terorista kagahapon sa kaadlawon (Biyernes).
Matud pa ni Sulu provincial police chief Antonio Freyra sa report ang 34-anyos nga si Veetil nakahigayon pag-eskapo samtang nangandam ang mga terorista sa ilang pamahaw.
Si Veetil kansang bungot ug balbas miabot na sa dughan mibutyag sa mga tigbalita nga human siya makaikyas sa kampo sa bukirong bahin sa Patikul dunay usa ka residente nga midala kaniya sa usa ka opisyal sa probinsya kinsa mao nay midala kaniya sa kapolisan ug pagkahuman gidala siya sa tambalanan.
Ang maong Indian nga si Veetil usa ka operations manager sa pabrika og mga sapot sa Kuwait, siya mibutyag nga niadtong Hunyo 2011 siya gisignit samtang siya mibisita sa pamilya sa iyang asawa diha sa Patikul.
Ang mga kidnappers nangayo og P300,000 ($7,100) nga ransom apan nagdumili pagbayad ang ilang pamilya, hinuon giklaro niyang wala siya pasipad-i sa mga terorista tungod kay siya usa ka Muslim.
Ang ASG nga nahimo nang notado sa pagpang-kidnap, pagpamunggot og ulo ug pagpamomba nalakip sa listahan sa mga terror group nga naglihok sa Pilipinas.
Gituohan nga duna pay Australian, Malaysian ug Japanese nationals nga gi-kidnap ang grupo lakip na niini ang usa ka beteranong Jordanian TV reporter nga si Baker Atyani ug duha ka Filipino crew nga duha ka bulan nang naa sa kustodiya sa ASG. (AP/EIM) - BANAT NEWS
- Latest
- Trending
