600 ka iro gisikop

CEBU, Philippines - Mikabat   na sa 600 ka mga iro   nasikop sa mga sakop sa City Pound sa dakbayan   sa Lapulapu sukad sa pagpahigayon sa Iron Man Philippines Triathlon sa milabay’ng semana.

Matud pa ni Lapulapu City Mayor Paz Radaza   nga magpadayon ang maong kampanya sa pagpanikop sa mga iro nga gitawag nga asong kalye kon “askal” kon libod-suroy nga mga iro sa kadalanan sa dakbayan sa Lapulapu hangtud nga ikadeklarar kini nga "rabies free" ang dakbayan.

Base sa ulahing talaan sa City Health Department sa dakbayan sa Lapulapu nasuta nga may tulo ka tawo niining bag-o nga napaakan sa iro nga rabison . Gumikan niini ang hepe sa City Pound gimanduan na ni Radaza nga labi pang pakusgan ang kampanya sa pagpamitik   sa mga libod-suroy nga iro aron masulbad   ang suliran bahin sa rabies sa maong dakbayan.

Hinuon andam man ang kagamhanan sa paghatag og   higayon sa mga tag-iya niini sa paglukat sa ilang mga iro uban ang pasidaan nga dili nila buhian ang ilang hayop.

Atol sa nagsingabot nga IronMan Triathlon sa milabay’ng Domingo gimando ni Radaza ang pagdakop sa mga iro nga libud-suroy   ilabi na sa mga rota sa cycling race isip proteksyon sa mga atleta. Kasagaran sa mga libod-suroy nga iro kusog manggukod sa mga tawong magsakay og biseklita  o kaha molabang-labang s a karsada nga kun madasmagan sa siklista maghatag og peligro sa kinabuhi niini ilabi na kun matumba   kini sa karsada.    - BANAT NEWS