Non-working holiday sa Aug.30 sa Mandaue

CEBU, Philippines - Gideklarar nga non-working holiday ang Agosto 30 niining tuiga sa siyudad sa Mandaue tungod sa ika- 43 nga kasaulogan sa Charter Day niini base sa Proclamation 426 nga gipirmahan ni Executive Secretary Paquito Ochoa sa ngalan ni Presidente Benigno Simeon Aquino III.

“It is fitting for the people of Mandaue to be given the full opportunity to celebrate and participate in the occasion with appropriate ceremonies,” sumala pa sa proklamasyon.

Nunot sa maong umaabot nga adlaw sa kasaulogan, ang kagamhanan sa Mandaue mihan-ay na og nagkalainlaing kalihokan nga molungtad hangtod sa Septiyembre 12 niining tuiga. Giisip kini sa kagamhanan sa maong dakbayan nga dobleng kasaulogan sanglit gawas nga ilang ika- 43 nga Charter Day Anniversary, saulogon usab nila ang Diamond Jubilee Celebration sa katukoran sa Mandaue Presidencia kon City Hall nga gitukod niadto pang Septiyembre 12, 1937.

Ang tema sa Charter Day celebration karong tuiga nag-ingon nga “An Outstanding Mandaue Starts With Me.”

Sa gihan-ay nga mga kalihokan mao ang naglakip sa awarding sa mga outstanding nga lokal ug national government employees, cultural ug sports activities.

Dugang pa nga kalihokan nga natumong usab sa maong kasaulogan sa dakbayan mao ang pagpahigayon og State of the City Address sa Septiyembre 5 diha sa Mandaue City and Sports and Cultural Complex sa sitio Tribunal sa barangay Centro.    - BANAT NEWS