Osmeña "anti-Cebu City"-Rama

CEBU, Philippines - Gihulagway ni Mayor Michael Rama nga iresponsableng lider ug “Anti-Cebu City” si Kongresista Tomas Osmeña tungod sa pagkanselar sa naulahi sa mga road projects niini sa habagatang distrito.

Ang pagkanselar ni Osmeña gikatahong nagumikan sa pagbabag ni Rama sa kapin P200 milyones nga road projects diha sa south district ug gisugyot sa mayor nga i-realign na lang ang pundo sa laing road repairs sa ubang bahin sa distrito.

Gisugyot ni Rama nga ipa-realign ang pundo nga gipaagi sa Department of Public Works and Highways sa mga dalan nga mas gubaon pa itandi sa mga dalan nga buot gastohan ni Osmeña nga ma-repair.

 Apan kusganon kining gisupak ni Osmeña ug mas pilion pa niyang mabalik ang budget alang niini ngadto sa national nga panudlanan tungod sa pagtuong gihimo kini sa mayor aron palutawon nga wala siya’y nahimo sa iyang distrito.

Usa sa mga dalan nga giingong buot nga ipa-kongkreto ni Osmeña mao ang V. Rama Avenue diha sa Barangay Guadalupe apan gihulagway kini ni Rama nga maayo pa nga dalan ug gianugonan siya sa pundo. “Unsa mana siya nga lider? Nganong ipakanselar man niya ang projects? Nga daghan intawon kaayo ang nanginahanglan ana nga budget. Wala man ko moingon nga ipakanselar, akong giingon nga ipa-realign,” sumala pa ni Rama.

Dugang pa sa mayor nga mosuwat siya kang Presidente Benigno S. Aquino III aron ipaubos sa realignment ang mga proyekto nga ipakanselar ni Osmeña.

“Kanang kuwartaha, dili man na iyaha, kwarta mana sa mga tawo, usa sa labing importante karon mao ang drainage system , seawall ug uban pa. Nganong ipasemento man gyud niya ang dalan nga tarong pa man na kaayo. Nagkalas-kalas lang gyud na sa kwarta,” sumala pa ni Rama.

Apan una na nga gibutyag ni Osmeña nga maayo ang semento gumikan kay molungtad kini og dugay nga panahon, dili sama sa aspalto nga dali ra maguba.( EIM)