Garbage truck natuwad 1 patay

CEBU, Philippines - Usa patay, ug lima ang naangol usa niini kritikal human ang trak sa basura sa dakbayan sa Talisay natuwad sa dulhogong bahin sa barangay Tapul, kagahapon sa hapon.

Patay nang nadangat sa tambalanan si Jerome Miaso, 20, ug giingong kritikal si Rick Lapinid ug naangol ang laing kauban niini nga si Renante Abatayo, taga barangay Dumlog, Talisay. Si PO3 Henry Diano kinsa maoy imbestigador sa insidente nagkanayon nga si Miaso, Lapinid ug Abatayo parehong mga mamasurahay nga nang-hitch ride paingon ngadto sa landfill sa barangay Tapul.

Samtang luwas ang drayber nga si Dante Olid, 44, apan naangol ang duha ka garbage collectors nga sila si Paterno Cañeda, ug Romel Amagos, 23.

Ang mga biktima daling gidala ngadto sa Talisay City District Hospital apan patay na si Miaso. Base sa imbestigasyon nawad-an og brake ang trak maong natuwad kini.

Sila si Lapinid, Abatayo, Cañeda ug Amagos diha sa likod sa truck dihang natuwad kini ug sila nadat-ogan sa mga basura apan si Miaso napiit sa truck hinungdan sa iyang kamatayon. ( EIM)   - BANAT NEWS