Ulitawo gibanhigan ug gipatay

CEBU, Philippines - Patay na sa paghiabot sa tambalanan ang usa ka ulitawo human dunggaba sa iyang silingan didto sa Das siyudad sa Toledo niadtong Martes sa kaadlawon.

Ang biktima mao si John Kenneth Amihan Edolantes, 21, ulitawo, nga nagpuyo sa maong lugar.

Samtang ang suspek mao ang iyang silingan nga si Bonnie Rebaya, hingkod ug ulitawo usab.

Si PO3 Enerio Roxam sa Toledo City Police Station mibutyag sa Banat News nga nag-inusarang naglakaw sa dalan ang biktima paingon sa ilang balay dihang gibanhigan kini sa suspek.

Nasuta sa kapolisan nga daan nang gipanid-an sa kriminal ang biktima ug dihang nahiagi kini sa maong lugar giduol kini sa suspek ug way daghang estorya gihansakan sa iyang kutsilyo.

Nasabak sa walang abaga ang biktima ug dihang nahagba kini sa yuta midagan ang suspek ug gibiyaan ang biktima ug ang mga tawo sa maong lugar nga nakaagi sa biktima maoy mihatod niini ngadto sa Carmen Copper Hospital diin kini ideklarar ni Dra. Irish Mangilimutan nga patay na sa paghiabot didto.

Padayon pang gipangita sa kapolisan ang suspetsado. - Darrel A. Carumba/WC (BANAT NEWS)