CEBU, Philippines - Gipamulta sa kapolisan og tag P500 ang tulo ka tawo nga naglakip sa duha ka mga security guard human kini hidakpi nga nagwara-wara sa armas de fuego gumikan sa kahubog didto sa dalan Hernan Cortes barangay Subangdaku, sa dakbayan sa Mandaue sa miaging gabii.
Ang mga suspetsado mao sila si Reynaldo Balsa, 38, ug Jaime Caylan, 29 nga pulos taga barangay tabok sa maong dakbayan, ug mga security guard sa mga establisemento sa maong dapit, samtang ang kauban nilang truckboy mao si Rey Montellano, 30, nga taga Hernan Cortes sa barangay Subangdaku.
Sumala ni PO3 Gilbert Igot sa kapolisan sa Presinto 2 sa Subangdaku nga naabtan nila ang tulo nga puwerting lasbaga human nila madawat ang taho kalabot sa pagwara-wara niini sa armas sa karsada sa maong lugar gumikan sa kalasbag sa giinom niining bino.
Nasakmit sa kapolisan ang 9mm pistol ni Balsa dayon gitanggong nila kini sa prisohan ug gipasakaan og kiha gumikan sa eskandalo nga ilang nahimo.
Human sila mobayad sa multa nga tag P500 ang matag usa gipagawas sila gikan sa prisohan ug gawasnon na sila karon. - Romeo T. Limpangog/WC (BANAT NEWS)