Mipusil sa 'drug suspect' nailhan

CEBU, Philippines - Aduna nay nailhan nga suspetsado sa pagpusil patay sa gidudahan drug personality sa miaging hapon.

Ang hepe sa kapolisan sa Cebu City Police Office Homicide Section nga si Sr. Insp. Jul Mohammad Jamiri mibutyag nga ang anggulo sa ilegal nga drugas maoy gitutukan nilang motibo sa pagpatay kang Sergio Zafra alyas Doming.

Si Zafra gipusil patay sa duha ka wala mailhing mga lalaking luwan og motorsiklo niadtong Martes sa hapon diha sa dalan Arcenas sa Banawa barangay Labangon dakbayan sa Sugbo.

Matud pa ni Jamiri sa Banat News base sa ilang nadawat nga report nalambigit kaniadto sa ilegal nga drugas si Zafra ug gani aduna pa kini standing warrant of arrest tungod sa maong ilegal nga kalihukan. Dugang nadawat nga impormasyong gibutyag ni Jamiri gikatahong dunay pakigkitaang drug personalities ang biktima nianang tungora dihang kini gipusil apan ilaha pa kining susihon, lakip sa tinuon sa mga imbestigador ang report nga duna kini utang nga P250 mil sa ilegal nga drugas diha sa usa ka drug suspect sa barangay Calamba.

Sumala pa samtang nagpaabot si Zafra kalit mibutho ang mga mamumuno ug mipusil kaniya makadaghang higayon. - Lesley Caminade-Vestil/EIM (BANAT NEWS)