Ex-convict miluba patay sa iyang silingan

CEBU, Philippines - Namatay ang usa ka 29 anyos nga lalaki human kini dunggaba sa iyang silingang ex- convict didto sa Sitio Dapdap, barangay Catarman, lungsod sa Liloan niadtong Martes sa gabii.

Ang biktima mao si Virgilio Abenasa, 29, minyo, nga nagpuyo sa nahisgutang lugar, samtang ang suspek mao usab si Marlon Bregoli, hingkod, nga taga sitio Tayud, barangay Tawagan, lungsod sa Consolacion, kinsa usa ka ex- convict.

Si PO3 Renato Pendo sa Liloan Police Station mibutyag sa Banat News nga base sa pamahayag ni Anelita ang inahan sa biktima, nga sa wala pa ang hitabo nagkalalis ang biktima ug ang suspek dihang gibadlong sa nahauna ang suspek kay nakiglalis kini sa iyang igsoong babaye.

Apan sa tanto nilang lalis nasuko ang suspek ug kalit kining milanit sa giluklok   niining kutsilyo ug dayun gihansakan sa dughan ang biktima.

Dihang nalup-og ang biktima ug naligo sa dugo niini daling miikyas ang suspetsado.

Ang biktima gihatud dayon ngadto sa Vicente Sotto Memorial Medical Center (VSMMC) apan wala dangti og dugay namatay kini.

Ang kapolisan padayon pang nangita karon sa suspek kinsa giingon nga sud-guwa lang kini sa prisohan matag karon ug unya. (/WC)(BANAT NEWS)