3 Way helmet patay

CEBU, Philippines - Namatay ang tulo ka mga lalaki nga nagsakay sa usa ka motorsiklo nga walay helmet dihang nadasmag sa giparking nga thriller truck daplin sa karsada sa Sitio Candabong, barangay Binlod, lungsod sa Argao kagahapon sa ala 1:20 sa kaadlawon.

Ang mga biktima mao sila si Christopher (Luisito) Cambarihan, 31, ulitawo nga may kapuyo, Genito Amazona, hingkod, ulitawo ug Silvestre Gumera, hingkod , nga ang tanan molupyo sa barangay Busala sa maong lungsod.

Samtang ang drayber sa nagparking nga trailer truck mao si Henry Aque, 39, minyo, nga taga Bais City Negros Oriental, ug ang drayber sa L-300 van nga giingong gipanag-iya sa Manila Bulletin mao si Benito Fuentenegra, hingkod, nga taga siyudad sa Mandaue.

Si PO2 Benjamen Gerrozaga, desk officer sa Argao Police Station mibutyag sa Banat News nga mihunong ang trailer truck sa maong lugar kay na-flat ang ligid niini, busa ang drayber nakatulog sa ibabaw sa mga karga niini.

Apan nahigmata ang drayber dihang nabati niini ang lagapak sa ubos sa trak ug dihang gisil-ing niya nangalagpot sa karsada ang tulo ka tawo kinsa pulos walay helmet, samtang ang ilang motorsiklo napasok sa ilawom de karga.

Unya kalit nga miabot ang usa ka L300 van ug malagmit nakurat ang drayber niini sa nagbay-ad nga mga patay’ng lawas sa mga biktima sa karsada, misuway kini og lihay apan mideretso hinuon kini og sawom sa kanal dayon natumba ug didto modat-og sa duha ka lawas patay nila ni Cambarihan ug Gumera busa maayong pagkapigsat niini.

Ang mga biktima gawas kang Cambarihan pulos hapit maputol ang mga liog kansang mga ulo pulos napiyapi gumikan sa kabug-at sa midat-og kanila nga L-300.

Sa paghimo ning balita ang kapolisan misukitsukit pa sa drayber sa L300 paghatag og katin-awan sa maong hitabo. (/WC) (BANAT NEWS)