Kalamposan sa Ironman dakong dungog sa Lapulapu

CEBU, Philippines - Ang kalampusan sa Iron Man Philippines Triathlon 2012 nga gipahigayon sa dakbayan sa Lapulapu sa miaging Domingo labing nakapapopular kang Mayor Paz Radaza sa maong dakbayan.

Si Caroline Steffen kinsa midaug sa womens’ category mipadayag sa iyang kalipay sa dihang iyang nakita ang gibanabana nga 25 mil ka mga estudyante sa kadalanan nga giagian sa rota sa triathlon nga nagmaya ug misuliyaw uban ang pagakpak ngadto   sa mga entrante sa maong torneyo.

Matud pa niya nga ang maong mga abiba nakapadasig pag-ayo sa mga atleta nga misalmot sa maong bangga.

Ang kagamhanan sa Lapulapu mihatag sa hingpit nga suporta sa maong paugnat sa kusog busa gipangandaman pag-ayo ang maong kalihokan una kini moabot .

Gipakatap sa kagamhanan sa dakbayan ang 1,500 ka polis niini nga mibantay sa seguridad, 100 ka mga medical personnel, 6 ka ambulansiya nga nagsubay ug nagsunod sa rota, 90 ka mga traffic enforcer alang sa paghapsay sa dagan sa trapiko, 100 ka water boys ug 15 ka mga volunteer nga gikan sa Lexmark.

May 65 usab ka mga pumpboat gikan sa isla sa Olango nga nagsilbing giya sa mga milangoy sa 1.9 kilometer nga gilay-on sa dagat ug ang DepEd mipadala sa 25 mil ka tinun-an niini isip tig-abiba sa mga atleta.

Gumikan niini si Mayor Radaza mapasalamaton kaayo sa mga tawo nga miabag sa preparasyon sa maong torneyo alang sa kalampusan niini.

Matud pa niya nga dako kaayong dungog sa dakbayan ang maong kalampusan sa Ironman aron usab masayran sa tibuok kalibotan nga ang dakbayan sa Lapulapu andam nga mo-alagad sa bisan unsang dagkong duwa sa paugnat sa kusog sama sa Davis Cup International nga malampuson usab kaayong gipahigayon sa miaging buwan sa dakbayan sa Lapulapu. (BANAT NEWS)