Modakop sa molimos kuwang

CEBU, Philippines - Giangkon sa hepe sa Cebu City Anti Mendicancy Task Force (CCAMTF) nga si Isabelita Ganub nga may problema ang maong grupo sa pagsumpo sa mga malapason sa City Ordinance 1631 nga nagdili sa paghatag og kuwarta ngadto sa makililimos.

Kini tungod kay matud pa ni Ganub may duha siya ka drayber ug tulo ka sakop sa task force busa kuwang kaayo ang maong puwersa.

Matud pa niya nga dili kini igo nga makatuyok sa tanang dapit sa dakbayan aron bantayan ang mga tawo nga mohatag og kuwarta sa mga makililimos. Miingon siya nga ang paghatag maayo man apan subay sa balaod gidili na kini tungod kay dili na makahunahuna pagpangita og laing panginabuhi ang makililimos kay may mobuhi man kanila nga    mga tawo nga manghatag og limos.

Apan dakong problema ang giatubang sa task force nga gitugyanan sa pagsikop sa mohatag og limos tungod kay dyutay ra kaayo sila .

Base sa balaod may multa nga P1,000 kutob sa madakpan sa akto nga mohatag og limos sa makililimos. Gipasabot hinuon ni Ganub nga nangayo na sila og tabang gikan sa mga opisyal sa barangay aron palihukon ang   ilang mga tanod aron mahimong epektibo ang maong balaod. 

Giangkon ni Ganub nga adunay mga barangay nga dili aktibo sa pag-implementar niini busa iyang giawhag ang tanang mga opisyales sa barangay nga mokooperar sa ilang kampanya.

Ang dakbayan sa Sugbo nagsaulog karon sa “Anti-Mendicancy Month” busa gipakusgan karon ang kampanya sa pagbadlong sa mga tawo gikan sa paghatag og kuwarta sa mga makililimos aron dili kini manganad. Matud pa niya nga wala’y makililimos kung walay mohatag og limos.

Sa laing bahin ang mga rapper nga usa usab sa matang sa pagpakilimos sulod sa mga sakyanang pasaheroan higpit na usab nga gidili sumala pa ni Ganub.

Ang rapper mao kining grupo sa mga batan-on nga way kaligo nga maglanses lang og kanta-kanta sa walay tuno nga kanta unya mamugos pagpangayo og limos sa mga pasahero ug kun malipat ang pasahero labnihan dayon sa mga butang ilabi na sa alahas. (BANAT NEWS)