CEBU, Philippines - Usa ka patay’ng lawas sa lalaki nga lata na ug dili na maklaro ang dagway nabangalan sa mga mananagat didto sa kadagatan sa isla sa Tanggengie, lungsod sa Madredijos sa isla sa Bantayan niadtong Domingo sa alas 11:00 sa buntag.
Ang maong patay’ng lawas gihulagway sa kapolisan nga adunay patik sa tuong bahin sa abaga nga gimarkahan sa pulong “love” unya gikulit ang “ heart”.
Si PO2 Julius Cesar Siares sa Madredijos Police Station mibutyag sa Banat News nga ang bangka nga Linda J Shipper kansang timonel mao si Capt. Asterio Cordova Opinga, 27, taga Bunacan,Madredijos maoy nakakita sa biktima.
Matud pa niya nga naglutaw kini sa dagat nga nagkuob busa gireport dayon nila kang kapitan Doroteo Doremon sa barangay Mansilang kinsa mao usab ang mipahibawo sa kapolisan.
Ang Municipal health officer nga si Dra. Elma Chen maoy mikonpirmar nga pagkalumos ang namatyan sa biktima base sa gipahigayon niyang autopsy niini.
Ang kapolisan miawhag sa publiko ilabi na kadtong nawad-an og sakop sa pamilya pagsusi og pag-ila niini.
Kagahapon usab sa udto ang caretaker sa sementeryo sa Madredijos nga si Lady Doblin mitawag kang Konsehal Emie Matis Gabito ug nananghid nga ila na lang ilubong dayon ang biktima ug kuhaan na lang og hulagway nga maoy ipakita sa mga tagtungod nga mangita niini gumikan sa hilabihang kabaho sa maong patay nga delikado na sa panglawas sa katawhan.
Gituohan nga ang biktima nalumos atol sa pagdagko sa bawod bunga sa bagyong Gener sa miaging adlaw. (BANAT NEWS)