Giluthang patay sa wa ilhing criminal

CEBU, Philippines - Namatay ang usa ka tawo human kini pusila sa wala hiilhing kriminal didto sa Sto. Tomas Village, barangay Tuburan Sur, dakbayan sa Danao sa miaging hapon.

Ang biktima mao si Jose Ricky Cimafranca Grecia, 43 , minyo ug walay trabaho nga nagpuyo sa maong dapit.

Si PO1 Faron Avila sa kapolisan sa maong dakbayan nga nahinabi sa Banat News miingon nga naglakaw ang biktima paingon sa ilang balay dihang kalit lang mitumaw ang usa ka lalaking armado ug sa walay igong hinungdan giluthang kini

Human mahagba sa yuta ang biktima dali kaayong nakasibat ang kriminal. Samdan ang biktima sa dughan ug dali kining gihatud sa mga tagtungod ngadto   sa Danao Provincial Hospital diin ideklarar nga dead on arrival. Si PO1 Avila miingon nga nagpabilin pa silang blangko sa pag-ila sa mamumuno sa biktima ug mao kini ang ilang gisuta karon kun kinsay kontra sa biktima. (BANAT NEWS)