KUSOG posibleng mosuporta sa Team Rama

CEBU, Philippines - Si Kapitan Jose Navarro sa Punta Princesa kinsa maoy adviser sa   Kugi Uswag Sugbo (Kusog) alang sa habagatang distrito    mibutyag nga dako gyud og purohan nga adto mosuportar sa Team Rama ang ilang grupo gumikan kay kasagaran sa ilang mga sakop gihulagway niya nga “Anti-BOPK”. Nasayran nga wala madayon ang pag-anunsyo sa Kusog kung kinsa ang ilang suportahan atol sa gipahigayon nila nga tigom niadtong Sabado sa gabii.

Suma pa ni Navarro nga magtigom sila og usab alang sa plano nga reorganization sa grupo. Kahinumdoman nga mibiya na sa Kusog ang miyembro nila nga si kapitan Eugenio Gabuya sa barangay Cogon- Pardo kay mitabok kini sa Bando Osmeña Pundok Kauswagan (BOPK) kay usa kini    sa mga gilista nga kandidato sa maong pundok alang sa umaabot nga election sa tuig 2013.

Samtang ang usa sa mga leader sa Kusog nga si Jonathan “Atan” Guardo mipadayag na usab sa iyang suporta sa pangulo sa BOPK nga si Kongresista Tomas Osmeña.

Matud pa ni Navarro nga wala mag-agi og tukmang proseso ang pagbiya nila ni Gabuya ug Guardo sa grupo busa iya kining gihagit nga mohimo og resignation letter.

“Improper man kaayo na, dapat mananghid sila og tarong,” suma pa ni Navarro.

Bisan wala pa’y opisyal nga baruganan ang Kusog kalabot sa ilang suportahan apan ang mga sakop niini una na nga mipadayag sa ilang suporta ngadto kang Mayor Michael Rama sama sa konsehal sa Barangay Tinago nga si Joel Garganera.

Samtang ang konsehal sa Barangay Lahug nga si Mary Ann delos Santos ug kapitan sa Sambag 1 nga si Jerry Guardo maoy pipila sa mga kandidato pagka-konsehal sa umaabot nga eleksyon ubos sa Team Rama. Gipadayag usab ni Navarro nga tigomon usab nila ang ubang mga opisyales sa barangay nga mga loyal sa Kusog. (BANAT NEWS)