Driver nasakmita'g shabu priso

CEBU, Philippines - Usa ka 37-anyos nga drayber sa habal-habal nagtingkagol sa Talisay City detention cell human kini maimbargohi og usa ka paketeng shabu atol sa saturation drive sa kapolisan didto sa sitio Hawod, barangay Bulacao, dakbayan sa Talisay sa miaging Sabado sa gabii.

Ang suspetsado mao si Esedrito Ramos, taga sitio Lower Bayong, barangay Candulawan, lungsod sa Minglanilla.

Si Insp. Hugo Rio Ipong sa pakighinabi sa Banat News kagahapon mibutyag nga sa mga alas 9:00 sa gabii niadtong Sabado nagpahigayon sila og check point sa national highway dapit sa barangay Bulacao dihang miduol kanila si Kapitan Raul Cabañero ug mihangyo nga ipalakip sa ilang saturation drive ang sitio Hawod.

Kini tungod kay sumala sa kapitan  nga nakadawat siya og report nga may namaligya og gidiling drugas sa maong lugar ug may tigpalitan usab niining magsakay og motorsiklo nga wala’y helmet.

Unya ang gireklamohan sa mga molupyo sa maong dapit mao ang ka-angso    sa ilang lugar tungod kay ang mamalitay og shabu   sa maong dapit anha lang magpatil-is sa ilang ihi sa kadaplinan sa karsada.

Busa gituman sa kapolisan ang gihangyo ni Kapitan Cabañero ug sila si Ipong mipahigayon dayon og saturation drive didto sa Hawod.

Pipila ka gutlo sa ilang pag-abot sa maong lugar nasigpatan nila ang suspetsado nga mogawas na unta gikan sa maong sitio nga nagsakay og motorsiklo apan wala’y helmet.

Unya pagtan-aw niini nga may mga otoridad nabantayan sa kapolisan nga may ilabay unta kining   butang apan ila kining nasanta.

Dihang ilang gisusi ang buot untang isalibay sa suspetsado, usa ka gamay’ng plastic sa shabu.

Nasuta usab sa kapolisan nga gawas nga wala’y helmet si Ramos, wala usab kini lisensya sa pagmaneho og motorsiklo.

Si Ramos gibalhug karon sa prisohan ug gi-impound usab ang motorsiklo nga iyang gisakyan ug andam na siyang pasakaan og kaso ngadto sa hukmanan.

  (BANAT NEWS)