Dughan gipalapsan sa sundang

CEBU, Philippines - Gipalapsan sa sundang ang dughan sa usa ka houseboy human kini lubaa sa construction worker nga iyang silingan didto sa sitio Mahiga, barangay Banilad, dakbayan sa Sugbo alas 2:00 pasado sa kaadlawon kagahapon.

Ang biktima nailhan nga si Romnick Archival, 21, molupyo sa maong lugar samtang ang suspetsado nailhan usab nga si Allan Cuizon,36, uban sa amigo niini nga si Orlando Baguio Survilla, 33, pulos mga trabahante sa construction ug mga silingan sa biktima.

Base sa imbestigasyon sa kapolisan nasayran nga ang biktima nag-inom og bino kang Cuizon ug ni Philip Survilla nga igsoon   ni Orlando samtang nagduwa sila og tong-its duol sa balay ni Philip.

Apan dihang nalasbag na kalit lang mitumaw ang lalis ni Cuizon ug sa biktima sa wala pa hisayring rason nga misangpot sa pagsinumbagay sa duha.

Ang igsoon sa biktima nga si Wilfredo giingong maoy unang miduol ug gi-ulang ang duha ug gidala niini ang biktima   ngadto sa layo aron makalikay sa kagubot dihang kalit kining milugnot dayon mituyok ug gibato ang balay ni Cuizon.

Si Cuizon nga daan nang nasuko, migawas dayon sa balay nga nagdala og sundang ug gigukod ang biktima uban ni Survilla.

Dihang naapsan nila ang biktima gikatahong gigunitan dayon kini   ni Survilla ug gihansakan usab dayon ni Cuizon sa iyang sundang ang dughan niini nga milapos sa bukobuko sa biktima, dayong kahagba niini sa yuta ug namatay diha-diha.

Si Cuizon dali kaayong nakasibat samtang si Survilla naabtan sa kapolisan ug maoy nasikop.

Padayon pang gipangita sa kapolisan si Cuizon samtang si Survilla gitanggong na sa prisohan ug nagpaabot sa tukmang kiha nga isang-at batok kanila. (/WC)(BANAT NEWS)