Mga pasahero nabiyaan sa flights tungod sa triathlon

CEBU, Philippines - Pipila ka mga pasahero sa Mactan Cebu International Airport ang mitiyabaw nga nangabiyaan sa ilang mga flights tungod sa pagpasira sa mga kadalanan alang sa international sporting event nga Ironman Philippines Triathlon 2012 kagahapon.

Nasayran sa Banat News dunay napulo ka mga pasaherong nabiyaan sa ilang flights tungod sa maong aberya.

Kasagaran sa mga nabiyaan dili gikan dinhi sa Sugbu kundi gikan sa kaulohan ug ubang bahin sa nasud nga wala makabantay sa maong paugnat sa kusog nga gipahigayon kagahapon.

Sila naabtan sa pagtak-op sa mga dalan nga maoy gisubayan sa rota sa bike race sa triathlon competition gikan sa Lapulapu ngadto na sa dakbayan sa Talisay.

Apan si Mary Ann Demabayao, ang tigpamaba sa MCIA Public Affairs mipadayag nga normal lang ang tanang schedules sa mga biyahe sa mga abyon sa maong tugpahanan.

Ang domestic flights agi og konsiderasyon sa kalangay mihatag og dugang 15- minutos nga lugway aron mapaabot ang mga pasahero sa matag airline company, matud pang Demabayao.

Samtang si Lapulapu City Mayor Paz Radaza mipadayag nga dili na sila mabasol sa maong hitabo gumikan kay kapin sa bulan na nilang gisugdan ang pagpahibalo sa publiko pinaagi sa media nga adunay sirad-ang mga rota sa dalan tungod sa maong event. (BANAT NEWS)