Batuhan gituboy sa mga urban poor

CEBU, Philippines - Moabot ngadto sa 165 ka mga homeowners association sa habagatang distrito ang pormal nga miendorsar kang Atty. Aristotle Batuhan aron maoy padaganon nila pagka-kongresista sa ilang distrito sa umaabot nga piniliay sunod tuig.

Sumala pa sa tsirman sa Urban Poor Alliance sa siyudad sa Sugbo nga si Rodrigo Buhawe nga ilang suportahan si Batuhan tungod sa kadako sa ilang pagsalig nga may katakos kini pagtabang kanilang mga kabus.

Bisan pa man niini si Batuhan nga usa ka independente nagkanayon nga magpadayon gihapon ang iyang mga konsultasyon karon sa nagkadaiya nga barangay.

Nasayran nga ang duha ka higanteng politikanhong grupo sa dakbayan aduna nay tagsa-tagsa ka mga manok alang sa pagka-kongresista sa habagatang distrito sa dakbayan.

Si Konsehal Rodrigo Bebot Abellanosa maoy pambato sa Bando Osmeña Pundok Kauswagan (BOPK) ug kanhi kongresista Antonio Cuenco alang sa Team Rama.

Gitataw ni Batuhan nga gawas sa sektor sa urban poor, nakadawat na usab siya og suporta gikan sa sektor sa transportasyon, kababayen-an ug kabatan-onan. Nasayran nga kaduha na nagpapili si Batuhan pagka-kongresista sa maong distrito apan naparot.

Matud pa niya nga ubay-ubay na usab ang iyang nakat-onan sa pagdumala sa gobiyerno sanglit nahimo man siya kaniadto nga under-secretary sa Department of Transportation and Communication. – (BANAT NEWS)