Arroyo natuk-an sa pakwan ug bacon - VMMC Head
CEBU, Philippines - Natuk-an sa gikaong pakwan ug gamay nga karneng susama og bacon si kanhi presidente ug karon kongresista Gloria Macapagal Arroyo kinsa gidala sa Veterans Memorial Medical Center niadtong Huwebes sa gabii.
Sumala pa sa report sa GMA News Online, si VMMC head Dr. Nona Legaspi gitambagan na si Arroyo nga mopahuway una tungod kay nabantayan nilang mihugo kini dihang gidala niadtong Huwebes sa gabii diha sa maong tambalanan.
"We have to consider medyo may anatomic problem sa leeg. ‘Yung pag-move dapat may maneuver for the food to go down. Apparently nakasabay yata sa melon was a piece of meat, (Arroyo) swallowed some sort of bacon-like meat," matud pa ni Legaspi dihang giinterbyu kini sa dzBB radio.
Niadtong Huwebes sa gabii gidala si Arroyo sa VMMC tungod sa gipamating acute cervical ug lumbar pain.
Dugang pa niini gitambagan si Arroyo nga kinahanglang mopahuway, likayan ang pagbiyahe ug pugson gyud nga makakaon tungod kay dako kini og papel alang sa hingpit niyang kaayohan.
Si Arroyo sayo niining semanaha mitambong sa usa ka sesyon sa Ubos Balaybalauranan sa unang higayon gikan sa pagkabilanggo niini sugod niadtong milabay’ng tuig.
Dili pa lang dugay nakagawas gikan sa pagka-hospital arrest sa VMMC si Arroyo human kini tuguti sa korte nga makabutang og piyansa sa kasong electoral sabotage tungod sa kahuyang sa ebidensya batok sa kanhi pangulo. Gikan sa Wires/EIM - BANAT NEWS
- Latest
- Trending
