Gidudahang mosumbong sa polis tanod gipatay

CEBU, Philippines - Gipusil patay sa usa ka wanted ang usa ka tanod nga gituohan niyang paingon mosumbong sa mga polis sa iyang gitagoan diha sa bukirang bahin sa barangay Canbantog sa lungsod sa Argao niadtong Miyerkules sa alas 5:10 sa hapon.

Ang biktima nga nabulit sa samad pinusilan mao si Constancio Villegas, 53, tanod sa nahisgutang lugar ug sakop sab sa Communication Center sa lungsod sa Argao.

Samtang ang gitumbok nga suspek mao si Joselito Albeso Alyas Eyet, molupyo ra sa maong lugar ug nagtagotago tungod kay giingong wanted sa kasong murder.

Matud ni PO2 Benjamen Gerozaga, desk officer sa Argao Police dihang nahinabi sa Banat News base sa imbestigasyon nagduda ang suspek nga nagpunay og tawag ang biktima ngadto sa kapolisan pinaagi sa handheld radio nga gikuptan niini.

Tungod niini giduol kini sa suspek dayong pusil makadaghang higayon, ang kauban sa biktima nga dili layo ang nahimutangan sa nahitaboan nakakita sa pagpusil ni Albeso sa biktima.

Sumala pa ni Gerozaga nagpunay og pislit sa “press to talk”(PTT) button ang biktima aron unta susihon ang ilang signal sa bag-ohay gitaod nga antenna sa munisipyo sa maong barangay aron pag-establisar og klarong signal.

Dugang pa ni Gerozaga giingong gidakdakan pa og bato sa suspek ang ulo sa biktima bisan nahagba na kini, ug pagkakita sa kauban ni Gerozaga gipusil usab kini apan nakadagan palayo ug misumbong sa kapulisan.

Nakuha gikan sa crime scene ang kalibre .38 nga paltik nga dunay tulo ka bala sud sa tambor niini nga gituohang iya sa biktima.

Ang suspek kinsa padayon pang gipangita matud ni Gerozaga posibleng nagtuong mitawag ang biktima sa kapolisan human siya masigpati niini diha sa maong dapit. ( /EIM) - BANAT NEWS