CEBU, Philippines - Duha sa 166 ka kawani sa General Services Office (GSO) sa Cebu City Hall nga gipaubos sa surprise drug testing kagahapon nasakpan nga positibo sa paggamit og gidiling drugas.
Sumala pa ni Noel Artes, ang pangulo sa City Office on Substance Abuse and Prevention (COSAP) nga ang GSO maoy pipila lang sa mga departamento sa City Hall nga gipaubos nila sa drug test.
Sumala pa ni Artes nga kun ugaling sa confirmatory test, mapalgan nga positibo gihapon ang maong mga kawani diha-diha himoan dayon kini og lakang sa Human Resource Department sa pagsuspenso o kaha sa dili na pag-renew sa ilang kontrata kun mga contractual sila nga trabahante.
Matud pa ni Artes nga lain na usab nga departamento ang ilang isunod sa surprise drug testing sa sunod nga mga adlaw.
Apan gawas sa mga drug testing sa City Hall, ang COSAP nagpahigayon usab og drug test sa mga kawani sa kabarangayan. (BANAT NEWS)