P10 milyones gitagana alang sa mass feeding

CEBU, Philippines - Mokabat sa 8,434 ka mga tinun-an sa day care centers sa Siyudad sa Sugbo ang makabenepisyo sa mass feeding sa siyudad sa Sugbo sulod sa unom ka buwan.

Sumala pa sa pangulo sa Department of Social Welfare Services (DSWS) nga si Dr. Ester Concha nga ang budget sa maong programa nagikan sa Department of Social Welfare Development (DSWD) nga moabot ngadto sa P10 milyones. Ang siyudad sa Sugbo adunay 157 day care centers nga buot suplayan og pagkaon sa siyudad sulod sa unom ka bulan. Giingong puno sa bitamina alang sa kahimsog sa mga bata ang ipakaon sa maong programa.

Gidasig sa siyudad ang mga ginikanan nga kinahanglang pakan-on ang ilang anak og saktong pagkaon sama sa utanon ug prutas ug dili mga junk foods.

Malampuson usab sa miaging buwan ang pagpakaon sa 30 ka mga batang Badjao diha sa Alaska Mambaling nga kabahin sa programa sa siyudad nga ‘Supplemental Feeding for Badjao Children.’

Gawas sa DSWS, mikooperar sa maong kalihukan ang Cebu City Commission for the Welfare and Protection of Children (CWPC) ug National Commission on Indigenous Peoples (NCIP).

Nasayran nga ang maong programa gihimo na matag tuig ug gisugdan kini sukad niadtong tuig 2006 ug gipadayon na kini matag tuig. - BANAT NEWS