CNA sa mga kawani gitun-an ni Gwen

CEBU, Philippines - Tun-an una ni Governor Gwendolyn Garcia ang Collective Negotiation Agreement (CNA) sa Provincial Employees Association of Cebu (PEACE) kalabot sa ilang gihangyo nga benepisyo alang sa mga empleyado sa Kapitolyo sa lalawigan sa Sugbo.

Kini ang gibutyag sa governor ngadto sa mga sakop sa media human   siya pangutan-a bahin sa tuyo sa mga opisyal sa PEACE kinsa nakigtagbo kaniya dili pa dugay.

Wala hinuon ibutyag sa gobernador kun unsang mga benepisyoha ang giyangungo sa mga empleyado kaniya apan gipasalig niya nga andam siya sa paghatag niini.

Ang PEACE gipangulohan sa ilang presidente nga si Jack Jakosalem (dili ang kanhi konsehal sa siyudad sa Sugbo) mipresentar sa ilang CNA ngadto sa gobernador

Hinuon matud pa sa gobernador nga wala siya’y nakita nga kakulian sa nahisgutang CNA.

Gani iyang gipasabot nga kanunay siya niiining pabor kung ang kaayohan na sa mga empleyado sa Kapitolyo   maoy hisgotan.

Si Garcia kinsa mokandidato sa pagka-senador miingon nga   ubos sa iyang administrasyon iyang gihatag ang mga benepisyo ngadto sa mga empleyado bisan og wala kini mangayo.

Tungod niini gitakda   sa gobernador nga pirmahan ang maong kasabotan tali sa mga opisyal sa PEACE sa higayong may resolusyon na ang hunta probinsyal nga magtugot kaniya sa paghimo sa ingon.

Sa pagkakaron gipaabot na lang sa gobernador ang nahisgotang action sa hunta sa  mga magbabalaod sa lalawigan   - BANAT NEWS